Ինչպե՞ս պատրաստել քյաբաբ ջեռոցում՝ համեղ և առաջին փորձից

Բովանդակություն

1.       Քյաբաբ՝ Էսթետների և թագավորների ճաշատեսակ
2.       Բաղադրիչներ
3.       Պատրաստում ենք քյաբաբ՝ քայլ առ քայլ
4.       Գեղեցիկ մատուցում

Քյաբաբ՝ Էսթետների և թագավորների ճաշատեսակ

Քյաբաբը պարզապես ճաշատեսակ չէ, այն մի ամբողջ պատմություն է։ Հետևաբար, նախքան այն պատրաստելը, եկեք հարգանքի տուրք մատուցենք մեր նախնիներին, ովքեր հորինել են այս գլուխգործոցը: Քյաբաբը մերձավորարևելյան, միջինասիական և կովկասյան խոհանոցների ավանդական ուտեստ է։ Թե որ երկրում է հայտնագործվել, հստակ հայտնի չէ, սակայն հնագետները շարունակում են դրա հետքերը գտնել աշխարհի տարբեր անկյուններում: Այսպես, օրինակ, Փարիզից ոչ հեռու մի քարանձավում գիտնականները հայտնաբերել են մի հնագույն ժայռապատկեր, որում մի մարդ հաճույքով ուտում է միս՝ շամփուրի վրա: Իսկ եգիպտական Գիզայում քյաբաբ գտել են հենց Թութանհամեն փարավոնի գերեզմանում։ Մի խոսքով, քյաբաբը էսթետների ու թագավորների կերակուր է։

Այս ուտեստը սովորաբար պատրաստվում է ոչխարի կամ տավարի մսից, որը շամփուրներով խորովում են կրակի վրա։

Հայաստանում քյաբաբը մշակույթի և խոհանոցի անբաժանելի մասն է։ Այստեղ քյաբաբ պատրաստելը համարվում է արվեստ, որը պահանջում է որոշակի փորձ ու հմտություն։ Ոչ մի հայ խոհարար չի զբաղվի այս ուտեստի պատրաստմամբ, եթե միսը որակյալ չէ։ Հետեւաբար, մի գնեք պատրաստի կամ, առավել ևս, սառեցված աղացած միս: Ճիշտ կլինի գնալ շուկա, գնել մեկ կիլոգրամ գառան միս և ինքնուրույն աղալ։ Ողջ հայ ժողովուրդը ձեզ երախտապարտ կլինի դրա համար, քանի որ միայն այդպես դուք կկարողանաք գնահատել քյաբաբի իսկական համը։

Լուսանկարը՝ RDNE Stock նախագիծ

Բաղադրիչներ

Քյաբաբ պատրաստելու համար ձեզ հարկավոր են հետևյալ բաղադրիչները.

• 1 կգ գառան փափուկ միս
• 125 գ գառան ճարպ
• 85 գ խոզի ճարպ
• 2 գլուխ սոխ
• 1 ճ.գ աղացած կարմիր պղպեղ
• 1 ճ.գ զիրա
• 1 ճ.գ աղացած համեմ
• 15 գ աղ
• 1 ճ.գ աղացած սև պղպեղ
• փայտե շամփուրներ
• լավաշ կամ պիտա մատուցելու համար։

Քյաբաբը սովորաբար մատուցում են սոխով։ Խրթխրթան, համեղ սոխ պատրաստելու համար ձեզ հարկավոր է.

• 2 գլուխ սոխ
• 7 գ շաքարավազ
• կիտրոնի հյութ
• թարմ սամիթ։

Լուսանկարը՝ Կամար Այդինով

Պատրաստում ենք քյաբաբ՝ քայլ առ քայլ

Այժմ, երբ բոլոր բաղադրիչները պատրաստ են, եկեք սկսենք ամենակարևորը՝ պատրաստել: Հարմարության համար ամեն ինչ կանենք քայլ առ քայլ: Նախազգուշացնենք, որ պատրաստման ողջ գործընթացը՝ միսն աղալուց մինչև մատուցել, տևում է մոտ երեք ժամ, այնպես որ երեկոյի համար այլ բան մի պլանավորեք:

1. Միսը կտրատեք խորանարդների տեսքով և աղացեք: Օգտագործեք հնարավորինս մեծ անցքերով աղաց: Մսի հետ աղացեք նաև ոչխարի և խոզի ճարպը: Արդյունքում կստանաք կատարյալ միս քյաբաբի համար։
2. 2 գլուխ սոխը մանր կտրատեք։ Որքան մանր, այնքան լավ:
3. Աղացած մսին ավելացրեք սոխը, աղը, աղացած սև պղպեղը, աղացած համեմը և աղացած կարմիր պղպեղը։
4. Զիրա ավելացրեք միայն այն հավանգի մեջ մանրացնելուց հետո։
5. Հիմա ամենակարևորը. այս ողջ գույնզգույն գեղեցկությունը մանրակրկիտ հունցեք ձեռքերով։
6. Այժմ մսային այս զանգվածը պետք է մանրակրկիտ հարել, որպեսզի այն սեղմվի և խտանա։ Պետք չէ մուրճ օգտագործել: Վերցրեք զանգվածը և մի քանի անգամ շրջեք այն դեպի ներս՝ հարելով բնորոշ ձայնով։
7. Աղացած միսը ծածկեք ափսեով և 30-40 րոպեով դրեք սառնարան։
8. Հիմա եկել է շամփուրների ժամանակը։ Որպեսզի դրանք չայրվեն ջեռոցում, 30 րոպեով դրեք սենյակային ջերմաստիճանի ջրի մեջ։ Դրանք կխոնավանան և չեն այրվի։
9. 40 րոպե հետո մեր միսը պատրաստ է։ Ժամանակն է սկսել ձևավորել քյաբաբը: Ձեռքերը թրջում ենք ջրի մեջ, որպեսզի ոչինչ չկպչի, և վերցնում ենք փոքր քանակությամբ աղացած միս՝ ափի չափ։ Խիտ կոտլետ ենք կազմում։ Մի շտապեք, յուրաքանչյուրը պետք է պատրաստել առնվազն 30 վայրկյան:
10. Երբ բոլոր կոտլետները պատրաստ լինեն, ժամանակն է դրանք շարել շամփուրների վրա։ Այնուհետև աղացած միսը հավասարաչափ բաշխում ենք, որպեսզի մսից մի տեսակ խողովակ ստացվի։
11. Ձևավորված քյաբաբն այժմ պետք է դնել թխման թերթիկով և բուսայուղով պատված թավայի վրա։
12. Ջեռոցը տաքացրեք մինչև 180 աստիճան և քյաբաբները ներս ուղարկեք 40 րոպեով։
13. Մինչ հոտը տարածվում է ձեր և հարևանների բնակարաններով, առաջարկում ենք պատրաստել սոխը։ Երկու գլուխ սոխը կտրատեք օղակաձև, ավելացրեք շաքարավազը, կիտրոնի հյութը և ձեռքերով թեթև տրորեք։ Ավելացրեք փոքր կտրատած թարմ սամիթը, խառնեք և թողեք 15 րոպե, որպեսզի համերը խառնելու քիմիական ռեակցիան հաջողությամբ ավարտվի։
14. Վերադառնանք քյաբաբին։ Մոտ 35-40 րոպե հետո դրանք պետք է կարմրեն, ինչը նշանակում է, որ արդեն պատրաստ են։ Հարկավոր չէ ավելի երկար պահել ջեռոցում, դրանք հեշտությամբ կարելի է չորացնել: Ժամանակն է մատուցել։ Բայց ինչպե"ս։

Լուսանկարը՝ Շադի

Գեղեցիկ մատուցում

Քյաբաբը պատրաստելուց հետո մնում է կարևոր մի քայլ՝ ճիշտ մատուցել այն։ Ահա մի քանի առաջարկություն.

1.     Քյաբաբը մատուցեք մեծ ափսեի կամ սկուտեղի վրա՝ դրա տոնական տեսքը ընդգծելու և բոլոր հյուրերի հարմարության համար:
2.     Գեղեցիկ տեսք ստանալու համար քյաբաբները շարքերով կամ շրջանակներով շարեք ափսեի վրա։
3.     Ճաշատեսակը լրացրեք թարմ բանջարեղենով և մի մոռացեք սոխի մասին։ Այն թարմություն և խրթխրթանություն կհաղորդի։
4.     Տարբեր սուսներ և աղցաններ առաջարկեք համը լրացնելու համար: Հաշվի առեք այնպիսի սոուսներ, ինչպիսիք են թկեմալին, աջիկան, սացեբելին կամ դասական կետչուպը:
5.     Եթե լավաշ կամ պիտա ունեք, հյուրերին առաջարկեք լավաշով բուրգերներ պատրաստել։ Բազմազան հավելյալ ուտեստներ առաջարկեք, ինչպիսիք են բանջարեղենը, սոուսները և պանիրը, որպեսզի յուրաքանչյուր հյուր կարողանա իր քիմքին համապատասխան ուտեստ ընտրել:
6.     Մի մոռացեք կիտրոն առաջարկել՝ մսին թարմություն և վառ համ հաղորդելու համար։
7.     Քյաբաբի հետ լավ համադրվում է նռան գինին։ Աստվածային այս նեկտարի մասին մենք գրել ենք այս հոդվածում։.

Լուսանկարը՝ Շադի

Տանը ջեռոցում քյաբաբ պատրաստելը հիանալի միջոց է՝ ձեզ և ձեր սիրելիներին ուրախացնելու կովկասյան խոհանոցի հայտնի, համեղ և բուրավետ ուտեստով: Հարկ է նշել, որ քյաբաբի բաղադրատոմսերը չափազանց շատ են, բայց մենք ընտրել ենք ամենաօպտիմալը՝ հաշվի առնելով ժամանակի ծախսը և անմոռանալի համը։ Սեղան նստելիս ստուգեք, թե արդյոք մուտքի դուռը բաց է, քանի որ, ուտեստի հոտն առնելով, ողջ թաղամասը հաստատ կցանկանա այցելել ձեզ: Իսկ քյաբաբը հաճելի է ուտել բազմամարդ ու աղմկոտ ընկերակցությամբ։

Հ.Գ. Եթե բաղադրատոմսը կարդալուց հետո հասկացաք, որ քյաբաբ եք ուզում, ապա կարող եք պատվիրել այն հայկական ռեստորաններից մեկում, որոնց ցանկը կարող եք գտնել մեր այստեղԱյստեղ ընդգրկված են միայն ստուգված վայրեր: Ինչպես նաեւ Move2Armenia Culture անցկացնում է խոհարարության անվճար վարպետության դասեր. Հետևեք հայտարարություններին.