Երևան. որտե՞ղ կարելի է փորձել ռուսական ուտեստներ և շոգեբաղնիք

Հայաստանի կառավարության տվյալներով՝ 2022 թվականին Հայաստան է մուտք գործել ավելի քան 110 հազար ռուսաստանցի։ Նրանց մեծ մասը ստացել է կացության թույլտվություն և հաստատվել Երևանում։Սա հատկապես նկատելի է մայրաքաղաքի կենտրոնում, որտեղ բոլոր անկյուններից լսվում է մաքուր ռուսերեն խոսք։

Հայրենակիցների հանդիպելը բարդ չէ, բայց մենք որոշեցինք համակարգել տեղեկատվությունը և պատմել ձեզ, թե Երևանում որտե՞ղ կարելի է զգալ քեզ ինչպես տանը,մի խոսքով՝ որտեղ փնտրել ռուսական ոգին Հայաստանում։

Բովանդակություն

1. Ռուսական շոգեբաղնիք
2. Ռուսական խոհանոց
3. Ռուսախոս համայնք

Ռուսական շոգեբաղնիք

Ռուսաստանում շոգեբաղնիքը պարզապես լվացվելու վայր չէ, այն հոգու և առողջության սրբավայր է։ Բազմաթիվ ռուսների մոտ շոգեբաղնիք այցելելն արդեն ավանդույթ է դարձել, և արտերկիր տեղափոխվելիս նրանց մարմինները տխրում են ու մի ցախավել պահանջում: Հայաստանում բաղնիքները դարավոր պատմություն ունեն, այստեղ ևս գնահատում են մաքուր մարմինը, ուստի Երևանը հոգնածությունը թոթափելու և նոր ուժեր հավաքելու բազմաթիվ տարբերակներ է առաջարկում։ Համամները և սաունաները այս հոդվածում չենք քննարկի: Եկեք կենտրոնանանք ավանդական ռուսական շոգեբաղնիքների վրա:

•  Երկնային Առանձնատուն (Небесный особняк)

Լոգանքի և առողջության այս համալիրը հյուրերին առաջարկում է ավանդական ռուսական շոգեբաղնիք, որտեղ, ըստ սեփականատերերի, «յուրաքանչյուր ոք կարող է շփվել իր ներաշխարհի հետ, սուզվել հոգու խորքերը՝ վերամիավորելով իր բնության հետ»: «Երկնային շոգեբաղնիքը» փորձած մարդկանց կարծիքները գալիս են հաստատելու այս համարձակ հայտարարությունը:

Այստեղ կարող եք ճաշակել Ալթայի խոտաբույսերի բույրով արոմագոլորշի, զգալ կեչու և կաղնու ճյուղերից պատրաստված ցախավելների հարվածները, ցատկել սառը ջրավազանն ու անսահմանափակ քանակությամբ թեյ ըմպել: Խալաթը, սրբիչը, հողաթափերը և գլխարկը, իսկ ցանկության դեպքում՝ նաև հաղթանդամ օգնականը, տրամադրվում են։ Ութ անձի համար չորս ժամով խմբակային այցելությունը կարժենա 300.000 դրամ։ Երեխաների մուտքն անվճար է:

Լուսանկարը՝ Avatars.mds.yandex.net

• Հյուրանոց Տոսկանա (Toscana)

Այս հյուրանոցում է գտնվում Երևանի լավագույն ռուսական բաղնիքներից մեկը։ Թեթև, հաճելի՝ շոգեբաղնիքի կատարյալ տարբերակ: Ժամանակին հենց այստեղ էր ռեփեր Տիմատին փորձում մաքրել իր դաջվածքները, գեղասահորդ Եվգենի Պլյուշչենկոն՝ տաքանալ, իսկ պոկերի վարպետ Դեն Բիլզերյանը՝ հանգստացնել նյարդերը։

Այս հաստատության սիրտը ոչ թե շքեղ էլեկտրական սարքավորումներն են, այլ ավանդական ռուսական վառարանը, որը շոգեբաղնիքում պահպանում է կայուն 60-80°C ջերմաստիճանը: Ջրի կաթիլները տաք քարերի վրա ստեղծում են ջերմության և խոնավության կատարյալ ներդաշնակություն, հեշտացնում են շնչառությունը, ոչնչացնում մաշկի բակտերիաները, վերացնում հոգնածությունն ու նյարդային լարվածությունը։ Բաղնիքի գներին կարող եք ծանոթանալ զանգահարելով +374 95 490088 հեռախոսահամարով։

Լուսանկարը՝ Toskana.am

• «Ծղոտներ» հյուրանոցային համալիր

«Ծղոտները» բավականին ընդարձակ հանգստի համալիր է Երևանի կենտրոնում: Այստեղ կա արևելյան, ֆիննական և երկու ռուսական բաղնիք: Առկա է նաև մեծ լողավազան, ջակուզի, պարի և բիլիարդի սենյակներ։ Առաջարկում են նաև մերսումներ և սպա բուժում:

Սեփականատերերը նկարագրում են իրենց հաստատությունը հետևյալ կերպ. «Երբ ասում ենք «սաունա», մենք հաճախ պատկերացնում ենք տաք, անօդ սենյակ, որտեղ դժվար է շնչել, և որտեղից ուզում ես հնարավորինս արագ փախչել: Մեր համալիրում իսկապես շունչդ կտրվում է, սակայն բացառապես ապշեցնող որակի և ծառայությունների ընտրության պատճառով է»: Հավելենք միայն, որ համալիրում հանգստի մեկ ժամը 1 անձի համար կարժենա 20 000 դրամ։

Լուսանկարը՝ Tsghotner.am

Ռուսական խոհանոց

Հայկական խոհանոցն, իհարկե, գերում է բոլոր հյուրերին առանց բացառության։ Բայց մի շփոթեք զբոսաշրջությունը արտագաղթի հետ. վաղ թե ուշ ռուսական ստամոքսը կցանկանա հանգստանալ քյաբաբից, «ո՛չ» ասել տոլմային և ինչ-որ հարազատ բան փորձել, օրինակ՝ մի կաթսա կաղամբով ապուր, նրբաբլիթներ, մի կտոր ծովատառեխ (селедка под шубой)։ Երեւանում դա բարդ բան չէ։ Ռուսներին հատկապես դուր են գալիս հետևյալ վայրերը․

• Ռեստորան «Սլավյանկա»

Այս հարմարավետ հաստատությունը վաղուց է վայելում շիկահեր, կապուտաչյա այցելուների վստահությունը: Այստեղ կարող եք գտնել այն ամենը, ինչ պահանջում է ռուսական հոգին. պելմենիներ թթվասերով, տարբեր տեսակի թթու վարունգներ, խոլոդեց, իսկ որպես նախուտեստ մատուցում են սոխով սալո։ Դրա հետ կարելի է խմել պղպեղի կամ մեղրի օղի, որոնք պատրաստում են հենց տեղում։

Լուսանկարը՝ Facebook.com

• Խորհրդային ակումբ (Советский клуб)

Խորհրդային ժամանակաշրջանը մեծ հետք է թողել ռուսական խոհանոցի վրա և իր ուրույն տեղն ունի ռուսների սրտերում: Այս հաստատությունում դուք ոչ միայն կփորձեք մարինացված ծովատառեխ խաշած կարտոֆիլով, բլիթներ աղացած միսով կամ Օլիվյե աղցան, այլ նաև կլսեք խորհրդային երաժշտություն: Շաբաթ օրերին այստեղ նույնիսկ դիսկոտեկներ են անցկացվում։

Լուսանկարը՝ Յուլիա Դյագիլևա

• Բորշ

Սա կիրթ հաստատություն է, որտեղ մատուցում են պելմենիներ, երեք տեսակի բորշ, խոլոդեց, ինչպես նաև ալկոհոլային խմիչքներ։ Ռեստորանին այլախոհական նրբերանգ են հաղորդում սալիկապատ սեղանները և պատերը, հեղինակային պաստառները և լամպերը, որոնք նայում են հոգուդ խորքը: Հատկապես խորհուրդ ենք տալիս կիրակի օրը փորձել խումարի նախաճաշը 4 000 դրամով։ Այն բաղկացած է սոլյանկայից, մանանեխով և ծովաբողկով սենդվիչից ու մի բաժակ թարմ լցնովի գարեջրից։ Հենց այն, ինչ պետք է ուրախ հանգստյան օրերից հետո:

Լուսանկարը՝ Facebook.com

Ռուսախոս համայնք

Որպեսզի միայնակ չնախաճաշեք, կարևոր է ընկերներ ձեռք բերել։ Երեւանում դա բավականին հեշտ է անել՝ կարևորը տանը չնստել։ Թե ինչպես հարմարվել Հայաստանում ու ապատիայի մեջ չընկնել գրել ենք մի լայնածավալ հոդված.

Ինչպես արդեն նշեցինք, փողոցում ռուսների հանդիպելը դժվար չէ։ Բայց եթե դուք առաջինը խոսակցություն սկսելու սիրահար չեք, ապա արժե այցելել այն վայրերից մեկը, որտեղ մարդիկ հավաքվում են՝ ելնելով իրենց հետաքրքրություններից: Ընդհանուր թեման կօգնի հանգստանալ ու նոր ծանոթություններ հաստատել։

Խորհուրդ ենք տալիս այցելել այս հարթակները: Այստեղ դրական մթնոլորտը երաշխավորված է, իսկ շաբաթական մի քանի անգամ տեղի են ունենում միջոցառումներ։

• Letters and Numbers

Այստեղ հանդիպում են արվեստագետներն ու արվեստասերները, գինի են խմում ու քննարկում արվեստի գործեր, դասախոսություններ կարդում ու կրթվում։ Իդեպ, սա նաև աշխատանքային տարածք է։;

• Dom Yerevan

Այս վայրը երաժշտասերների և երաժշտություն ստեղծողների համար է։ Այստեղ նաև հավաքվում են վարպետներ և ձեռքի աշխատանքներ պատրաստում։

• Common Ground Books & Spirits

Վայր գրքասերների համար։ Այստեղ անցկացվում են դասախոսություններ, քննարկվում են նոր գրքեր, անցկացվում են շնորհանդեսներ։ Իսկ Move2Armenia Culture Common Ground-ի բակում անցկացնում է ժողովրդական պարերի դասընթացներ։

• Triglinki

Սա համատեղ կենսատարածք է, որտեղ կազմակերպվում է միջոցառումների լայն շրջանակ՝ համերգներ, վարպետության դասեր, թրեյնինգներ, ֆիլմերի ցուցադրություններ, փոխանակումներ, յոգայի դասընթացներ, խմբային հոգեթերապիայի սեանսներ, մեդիտացիա և այլն։ Նախկինում այսպիսի հարթակ գործում էր միայն Սանկտ Պետերբուրգում, որտեղ հիմնադիրները հասցրել էին ավելի քան 1000 միջոցառում անցկացնել։ Այժմ նրանք գործում են նաև Երևանում և պատրաստ են հարթակ դառնալ ցանկացած նախաձեռնության համար, բացի հացադուլից։

Եթե թվարկված տարբերակները ինչ-ինչ պատճառներով ձեզ չեն համապատասխանում, կարող եք հատուկ ձեզ համար հետաքրքիր բան փնտրել հոդվածում, որտեղ մենք հավաքել ենք 140 օգտակար Telegram ալիք ներգաղթյալների համար։

Ընդհանուր հետաքրքրություն կարող է լինել նաև հայերեն սովորելը։ Վաղ թե ուշ այս մասին մտածում են շատերը, ովքեր որոշում են ավելի երկար մնալ Երեւանում։ Այս դասընթացներին անպայման կհանդիպեք ակտիվ ու նպատակասլաց հայրենակիցների։ Այնպես որ, այցելեք մեզ Move2Armenia Culture.