Ալեքսանդր Սպենդիարյանի տուն-թանգարան

Ալեքսանդր Սպենդիարյանը հայտնի կոմպոզիտոր, դիրիժոր և սիմֆոնիկ երաժշտության հիմնադիր է Հայաստանում։ Սպենդիարյանի երաժշտական ժառանգությունը հարուստ է գեղարվեստական նոր հայեցակարգերով, ժանրերի բազմազանությամբ և արտահայտչական տեխնիկայով։

Ալեքսանդր Սպենդիարյանի տուն-թանգարանը հիմնադրվել է 1963 թվականին ՀԽՍՀ Նախարարների խորհրդի որոշմամբ՝ Նալբանդյան 23 (այժմ՝ 21) հասցեում, այն տանը, որտեղ ապրել է Ալեքսանդր Սպենդիարյանը կյանքի վերջին տարիներին՝ 1926-1928 թվականներին։

Տուն թանգարանը բացվել է 1967 թվականին։ Սա առաջին երաժշտական հուշահամալիրի թանգարանն է Հայաստանում։ Տուն-թանգարանի հավաքածուն սկզբում բաղկացած էր 400 իրից, հետագայում ֆոնդերը համալրվեցին, իսկ ներկայումս ֆոնդի հավաքածուն ներառում է ավելի քան 1350 թանգարանային իր։ Սրանք Սպենդիարյանի անձնական իրերն են, ձեռագիր և տպագիր գրառումներ, նամակներ, փաստաթղթեր, լուսանկարներ, մամուլ և գրքեր։ Տուն-թանգարանի մշտական ցուցադրությունը ներառում է այնպիսի եզակի թանգարանային իրեր, ինչպիսիք են կոմպոզիտորի մտահղացմամբ ստեղծված «Սպենդիարոֆոն» երաժշտական գործիքը և Երևանում «Ալմաստ» օպերայի առաջին ներկայացման ազդագիրը (1933 թ.):

2011 թվականին վերականգնված տուն թանգարանն իր դռները բացեց հանրության առաջ նոր մշտական ցուցադրությամբ։ Թանգարանը երաժիշտների ու երաժշտասերների սիրելի վայրերից է, որտեղ պարբերաբար կազմակերպվում են համերգներ, դասախոսություններ, ցուցահանդեսներ, տարբեր կրթական ու մշակութային միջոցառումներ։