Երևանում տեղի կունենա անվանի ռուս ռեժիսոր Ալեքսանդր Սոկուրովի սանկտպետերբուրգյան արվեստանոցի շրջանավարտ Յուրի Մոկիենկոյի «Отцы» («Հայրեր») (2023) վավերագրական կատակերգության հայաստանյան պրեմիերան։

Կարծես բոլորն են լսել Ալեքսանդր Սոկուրովի Նալչիկում գործող հայտնի արվեստանոցի մասին։ Բայց ոչ բոլորը գիտեն, որ այնուհետև Սոկուրովը սկսեց դասավանդել Սանկտ Պետերբուրգի կինոյի և հեռուստատեսության ինստիտուտում։ Յուրի Մոկիենկոն հենց այդ համալսարանի շրջանավարտ է, իսկ «Հայրերը» նրա դիպլոմային աշխատանքը։

Սյուժեն կենտրոնանում է ռեժիսորի հոր և ավագ եղբոր վրա: Յուրիի հայրը գրող է, «Մոկեյ պապիկի մոտ» հաղորդաշարի հեղինակը, եղբայրը՝ երաժիշտ և թատերական պրոդյուսեր։ 2021 թվականի ամռանը գյուղում ժամանակ անցկացնելիս նրանք որոշում են մանկական ֆիլմերի փառատոն կազմակերպել։ Եվ նրանցից յուրաքանչյուրը նկարահանում է իր ֆիլմը․ «Ոչ ոք» անվանմամբ կատարյալ արտհաուս «Ռուսաստան» առեղծվածային երկրի մասին և «Մատնաչափիկը» ռոմանտիկ հեքիաթը: Նկարահանում են բջջային հեռախոսով՝ հարմարեցնելով այն ձեռքի տակ եղած իրերին։ Որպես դերասաններ հանդես են գալիս նրանց երեխաներն ու թոռները։ Նկարահանումներն անցնում են նյարդային, լարված, բայց զվարճալի մթնոլորտում։ Փառատոնն այցելում են շրջակա երեք գյուղերի բնակիչները, իսկ 2023 թվականին այն դառնում է միջազգային։

«Հայրեր» ֆիլմը մրցանակների է արժանացել Մոսկվայի, Վիբորգի և Եկատերինբուրգի կինոփառատոներում, ինչպես նաև ստացել է Ձիգա Վերտովի անվան մրցանակ որպես 2023 թվականի լավագույն վավերագրական դեբյուտ։

Ֆիլմը կցուցադրվի ռուսերեն՝ հայերեն ենթագրերով։ Ցուցադրությունից հետո կլինի քննարկում ռեժիսոր Յուրի Մոկիենկոյի հետ (zoom)։